Skemmtun með skeiðum

Við Hilma buðum vinum okkar í Álftavík um síðustu helgi og áttum þar voðalega fínar stundir saman. Þau Loftur, Guðrún, Amir og Rut komu með okkur og vitaskuld var okkar fyrsta verk að láta renna í pottinn, þremur tímum síðar var potturinn orðinn starfhæfur og gengið bleytti vel í sér, að innan sem utan.

Á laugardeginum kíktum við á Selfoss, hefðum betur sleppt því þar sem ég varð að horfa upp á Man. Utd. skora sigurmark gegn mínum mönnum í Liverpool á síðustu sekúndum leiksins. Óþolandi!

Að þessum hörmungum loknum héldum við á Þingvelli en gerðum smá stopp í Byrginu, bara svona rétt til þess að kíkja á það sem allir eru að tala um. Amir hafði að mér skildist aldrei áður komið á Þingvelli og því ekki seinna vænna en að taka þjóðrembuna á piltinn. Hann ætlaði varla að trúa því að í Drekkingarhyl hefði konum í alvöru verið drekkt en svo rakst hann á eitthvað skilti þarna sem var með útskýringum og þá varð hann sannfærður. Við s.s. drekktum kellingum á miðöldum.

Á laugardagskvöld grilluðum við okkur dýrindis lambalæri og skemmtum okkur með skeiðum svo eitthvað sé nefnt.

Fín helgi, gott fjör.

Jón Björn